Անջելինա Ջոլիի քիթը ամենացանկալին է հայաստանցիների համար

Հայաստանում պլաստիկ վիրաբուժության դիմողների քանակը տարեցտարի ավելանում է, քանի որ մարդիկ իրենց նկատմամբ դառնում են ավելի բծախնդիր և ավելի շատ ուշադրություն են դարձնում իրենց արտաքին տեսքին: Այսօր լրագրողների հետ հանդիպման ժամանակ նման կարծիք հայտնց 3-րդ քաղաքային կլինիկական հիվանդանոցի պլաստիկ և վերականգնողական միկրովիրաբուժության ծառայության ղեկավար Գևորգ Ստեփանյանը:

Նրա խոսքերով, եթե նախկինում մարդիկ հաճախ թաքցնում էին պլաստիկ վիրահատության դիմելու պատճառը, ապա այսօր դա, կարծես թե, նորաձև է դարձել: Գ. Ստեփանյանը տեղեկացրեց, որ քթի վիրահատությունը պետք է կատարել 17 տարեկանից սկսած, իսկ ավելի ցածր տարիքում չի կարելի վիրահատել, քանի որ ոսկրերի աճը դեռ շարունակվում է, իսկ, օրինակ, ականջախեցիների պլաստիկան կատարվում է նախադպրոցական հասակում, որպեսզի դպրոցում երեխաները հոգեբանական խնդիրներ չունենան: Ինչ վերաբերում է վիրահատությունից հետո առաջացած բարդություններին, միկրովիրաբույժն ասաց, որ ամեն ինչ արվում է, որպեսզի վիրահատական բարդություններից խուսափեն, բայց բոլոր վիրահատություններում էլ ռիսկի գործոնը մեծ է:

Հարցին, թե վիրահատությունից հետո հաճա՞խ են դժգոհություններ լինում, Գ.Ստեփանյանը պատասխանեց, որ դժգոհություններ լինում են այն դեպքում, եթե, ասենք, հիվանդի քիթը այդպես էլ չի նմանվել Անջելինա Ջոլիի քթին: «Հաճախ նրանք ոչ թե դժգոհ են լինում, այլ չեն տեսնում Անջելինա Ջոլիի քիթը, որի մասին երազում էին, բայց նախապես ասում ենք, որ չի լինելու Ջոլիի քիթը, քանի որ դա հենց քթի ձևից է կախված»,- ասաց Գ. Ստեփանյանը: Խոսելով մինչվիրահատական և հետվիրահատական դեպրեսիաներից՝ բժիշկը նշեց, որ իրենք հոգեբանական աշխատանք են տանում հիվանդների հետ:

Ինչ վերաբերում է գնային քաղաքականությանը, ապա Գ. Ստեփանյանն ասաց, որ կոնկրետ իրենց կլինիկայում գները մատչելի են, քանի որ փորձում են այնպես անել, որպեսզի պլաստիկ վիրահատությունը տարբեր սոցիալական խմբերի համար  հասանելի լինի: Նա նաև ընդգծեց, որ պլաստիկ վիրաբուժական ծառայությունների գնային համակարգը ոչ բոլոր բուժհաստատություններում է միանման, սակայն քթի վիրահատությունների նվազագույն գինը հանրապետության հիվանդանոցներում սկսվում է 80 000 դրամից:

Գ.Ստեփանյանը հայտնեց նաև, որ վերջին շրջանում Հայաստանում ավելացել են կրծքագեղձերի վիրահատության դիմողների թիվը: «Կարծում եմ՝ Հայաստանի համար բավականին մեծ է, սակայն քչերն են ասում, որ իրենց կուրծքը մեծացրել են»,- ասաց նա:

Նա նաև նշեց, որ Հայաստանում գործում է Պլաստիկ վիրաբույժների ասոցիացիան, որը հետամուտ է լինում աշխարհում տեղի ունեցող նորարարություններին, բուժման մեթոդներին` հաջողությամբ կիրառելով դրանք Հայաստանում:

Հոգեբան Մանե Սաղոյանի խոսքերով՝ գեղեցկությունը բաց երաշխավորական նամակ է և պլաստիկ միջամտությունը հաճախ արվում է ինքնագնահատականի բարձրացման համար: Նրա կարծիքով` շատերն իրենց արտաքին թերությունները կապում են անձնական կամ մասնագիտական անհաջողությունների հետ, դրա համար էլ դիմում են պլաստիկ վիրահատության: «Արտաքին թերությունը շտկելով՝ ենթագիտակցորեն մարդկանց ինքնագնահատականը բարձրանում է»,- ասաց հոգեբանը:

Հարցեր, պատասխաններ, մեկնաբանություններ