Մենք օգնում ենք ձեզ՝ բարելավելու կյանքի որակը. Ռաֆֆի Ջանեցյանը՝ urolog.am կայքի մասին

Urolog.am-ը հայտնի է որպես առաջին հայալեզու ուրոլոգիական մասնագիտական կայք։ Տղամարդու և կնոջ ընդհանուր առողջության, և մասնավորապես` միզային, սեռական և վերարտադրողական խնդիրների լուսաբանման, ինչպես նաև մարդկանց ցավոտ կամ հետաքրքրող հարցերի պատասխանը գտնելու առաքելություն ունի այս կայքը։

Մեր զրուցակիցն է կայքի հիմնադիր, հեղինակ, բժիշկ-ուրոլոգ Ռաֆֆի Ջանեցյանը։

- Պատմեք, խնդրեմ, ինչպե՞ս ստեղծվեց urolog.am կայքը։

- Urolog.am կայքը ստեղծվել է 2008 թվականին։ Ստեղծման պահին, կարելի է ասել, այնքան էլ տարածված չէին վեբկայքերը, մի քանի մասնագիտական օտարալեզու վեբկայքեր էին գործում, որոնք հասանելի չէին հայալեզու ընթերցողներին։ Ուստի կարիք կար ստեղծելու  տեղեկատվական, մասնագիտական ուրոլոգիական հարթակ, որի միջոցով յուրաքանչյուր ոք կկարողանար գտնել իրեն հուզող հարցի պատասխանը, անշուշտ, հանրամատչելի մեկնաբանությամբ։

Կայքը վարում եմ ինքս, ինչը, ինքներդ եք հասկանում, բավականին ժամանակատար գործ է, և անշուշտ, բարդ է համադրել մասնագիտական գործունեության հետ։

Կայքում զետեղվում են նաև իմ հեղինակային նյութերը՝ կանանց,  տղամարդկանց միզասեռական համակարգի հիվանդությունների, դրանց կանխարգելման և բուժման մասին։ Կարևորում ենք նաև զույգերի հոգեբանական խնդիրները, բժիշկ-հիվանդ հաղորդակցությունը և նաև այնպիսի նյութեր, որոնք համեմատաբար քիչ են լուսաբանվում։ Կայքում գործում է հարց ու պատասխան բաժինը, որը հնարավորություն է տալիս նամակագրման միջոցով ստանալ այդ հարցերի պատասխանները։ Մեր օգնում ենք մարդկանց՝ բարելավել կյանքի որակը, ապրել երկար, առողջ ու երջանիկ։  

- Հատկապես ո՞ր տարիքային խմբի համար է նախատեսված urolog.am-ը:

- Կայքը նախատեսված է տարիքային տարբեր խմբերի համար՝ 24-75։ Եվ ուրախ եմ, որ կայքի դիտումները գնալով շատանում են: Մեզ գրում են նաև արտերկրում բնակվող հայերը։ Այցելուների զգալի մասը կանայք են (տոկոսային հարաբերակցությամբ՝ 55% կին / 45% տղամարդ), և դա պատահական չէ։

Կանայք ցանկանում են տեղեկացված լինել ոչ միայն իրենց սեփական առողջության վերաբերող հարցերին, այլև իրենց տղամարդկանց առողջության սպառնալիքներին։ Սա շատ կարևոր է ու գովելի փաստ է։  

- Խոսենք Ձեր մասնագիտական գործունեության մասին։

- Չեմ սիրում, երբ ինձ սփյուռքահայ են անվանում, քանի որ նախ ես հայ եմ , հետո շատ վաղուց եմ մշտական բնակություն հաստատել Հայաստանում։

Բժշկական ուսումնառությունս այստեղ եմ ստացել։ Վերապատրաստվել եմ ԱՄՆ-ում, և ուրախ եմ, որ ստացածս գիտելիքները կիրառում եմ հենց այստեղ։

Ղեկավարել եմ տարբեր  ուրոլոգիական ծառայություններ։ Իսկ այժմ իմ պրակտիկ գործունեությունը` որպես ուրոլոգ, իրականացնում եմ Ուրոլոգիայի կենտրոնում։  Իսկ իմ ուրոլոգիական գործունեության մաս են կազմում՝ անպտղությունը, միզուղիների բորբոքումները, սեռավարակները, սեռական ֆունկցիայի խանգարումները, միզաքարային հիվանդությունը, անմիզապահությունը, շագանակագեղձի հիվանդությունները և ուրոլոգիական քաղցկեղը։

- Քանի որ խոսեցինք տղամարդու առողջության մասին, կա՞ անհրաժեշտություն տարին մեկ անգամ դիմելու ուրոլոգին։

- Եթե խոսքը երիտասարդ տարիքի տղամարդկանց մասին է, ապա հիմնական հանդիպող խնդիրը սեռական ճանապարհով ձեռքբերած հիվանդություններն են, շատ դեպքերում` անտեսված, կամ ոչ լիարժեք բուժված, ինչի հետևանքով հիվանդությունը քրոնիկ ընթացք է ձեռքբերում։ Այն երբեմն կարող է առաջացնել սերմի որակի վատթարացում կամ անպտղություն։

Ինչ վերաբերում է 40-ն անց տարիքի տղամարդկանց, այո, ցուցված է տարին մեկ անգամ այցելել ուրոլոգի և կատարել համապատասխան հետազոտություններ, քանի որ այս տարիքում մեծանում է շագանակագեղձի չարորակ գոյացությունների առաջացման ռիսկը: Բարձր տարիքային շեմում գտնվող տղամարդու առողջությունը պետք է մշտապես վերահսկվի ուրոլոգի կողմից։ Այս տարիքում տղամարդկանց մոտ հիմնական խնդիրը միզարձակման ֆունկցիայի խանգարումն է։ Որոշ բարձիթողի դեպքերը կարող են վնասել նաև երիկամների ֆունկցիան։

Այս առումով հարկ է նշել, որ ուրոլոգը ոչ միայն տղամարդկանց խնդիրներով է զբաղվում, այլ նաև`կանանց։ Կանանց մոտ հաճախ հանդիպող խնդիրներից է քրոնիկական ցիստիտն ու անմիզապահությունը։ Հատկապես կարևոր է լիարժեք բուժել կանանց միզուղիների բորբոքումները ամուսնությունից հետո կամ մինչ հղիությունը՝ խուսափելու համար հետագա բարդություններից։       

- Խոսենք բժիշկ-պացիենտ հարաբերության մասին։ Շատերը ամաչում են դիմել ուրոլոգին։

-  Ազգաբնակչության կրթվածության աստիճանը բավականին փոխվել է։ Մարդիկ ավելի հետևողական են դարձել իրենց սեփական առողջության հետ կապված խնդիրներին։ Վերադառնալով urolog.am-ին, հարկ եմ համարում նշել, որ այն  մարդկանց հնարավորություն է տալիս՝ անկաշկանդ ներկայացնելու իրենց խնդիրը ու ստանալու իրենց հարցի պատասխանը։ Մենք ձգտում ենք մեր այցելուների շրջանում ձևավորել առողջության դրական վարքագիծ, ինչը կօգնի խուսափելու մի շարք հիվանդություններից և ունենալու երջանիկ կյանք։

- Ինչպեսի՞ հեռանկարներ կան հայկական բժշկության  և ուրոլոգիայի զարգացման գործընթացում։

- Ուրոլոգիան չեմ առանձնացնում ընդհանուր բժշկությունից, քանի որ այն ընդհանուր բժշկության մաս է կազմում։ Իհարկե, վերջին տարիներին բժշկությունն ամբողջ աշխարհում մեծ զարգացում է ապրում։ Եթե խոսենք Հայաստանի մասին, ապա կան որոշակի խնդիրներ կապված բուհական և հետբուհական կրթության մակարդակի, ինչպես նաև հետագա մասնագիտական աշխատանքի հնարավորության հետ։ Ուրոլոգիայի ոլորտում բավականին մեծ առաջընթաց է գրանցվում, բայց միշտ աճելու, զարգանալու, նոր գիտելիքներ ձեռքբերելու կարիք կա՝ հատկապես նոր գործիքային հետազոտությունների և վիրահատական միջամտությունների նոր տեխնոլոգիաների ներմուծման առումով։

- Կորոնավիրուսն ի՞նչ հետևանքներ է թողնում։

- Ամբողջ աշխարհում դեռ վիճակագրական տվյալների հավաքագրումն ավարտված չէ։ Ընդհանուր առմամբ այս համավարակի պարտադրած սոցիալական մեկուսացումը բացասական ազդեցություն ունի տղամարդու ֆիզիկական և հոգեկան առողջության, ինչպես նաև տղամարդ-կին հարաբերությունների վրա։

Որոշ դեպքերում կորոնավիրուսի հետևանքով տղամարդկանց մոտ առաջանում են միզարձակման ֆունկցիայի խանգարումներ և շագանակագեղձի բորբոքման ախտանշաններ։ Ընդհանուր առմամբ կորոնավիրուսը ազդում է մարդու տարբեր օրգան համակարգերի վրա և ունի բացասական ազդեցություն ունի կյանքի որակի վրա։ Իմ խորհուրդն է. ուշադիր լինել սեփական առողջության նկատմամբ, դրական վարքագիծ ձևավորել, հրաժարվել վնասակար սովորություններից (ալկոհոլ, ծխախոտ և այլն), զբաղվել սպորտով ու հետևել ճիշտ սննդակարգի։

Հարցեր, պատասխաններ, մեկնաբանություններ