Սկսենք մեզնից. «էրեբունի» բժշկական կենտրոնն ապահովագրում է իր աշխատակիցների առողջությունը

Ոչ ոք ապահովագրված չէ հիվանդություններից կամ դժբախտ պատահարներից։ Բայց շատ դեպքերում, չտեղավորվելով պետության կողմից երաշխավորված անվճար բուժօգնություն ստացողների խմբերում, մարդիկ ի վիճակի չեն լինում օգտվելու այդ ծառայություններից եւ բավական դժվար կացության մեջ են հայտնվում։

Ասենք, մարդուն ինֆարկտով հիվանդանոց են տեղափոխել, եւ զոնդավորման կամ ստենդավորման անհրաժեշտություն կա։ Բավական թանկ այդ ծառայությունները գրեթե բոլոր ընտանիքների համար լուրջ խնդիրներ են առաջացնում։

Երեկ «էրեբունի» բժշկական կենտրոն էին հրավիրվել Հայաստանում գործող «Գարանտ-Լիմենս», «Նաիրի ինշուրանս», «Ռոսգոսստրախ Արմենիա», «Ռեսո» եւ «Ինգո-Արմենիա» ապահովագրական ընկերությունների ներկայացուցիչները։ Մինչ այդ կենտրոնի ղեկավարությունն աշխատակիցների հետ քննարկել է բժշկական կամավոր ապահովագրական ծրագրերում ընդգրկվելու հարցը։ «Մարդկանց պատշաճ բժշկական սպասարկում ապահովելու նպատակով ապահովագրական բժշկությունն այսօր ողջ աշխահրում կայացած համակարգ է։ Հայաստանում դեռեւս չի գործում պարտադիր բժշկական ապահովագրությունը, սակայն հստակ է, որ մեր կառավարության, ՀՀ առողջապահության նախարարության հիմնական ուղղվածությունն այն է, որ պետբյուջեի գումարներով լիարժեք, որակյալ բուժօգնություն ցուցաբերվի սոցիալապես անապահով խմբերին։

Այսօր ներկայացված կամավոր ապահովագրական գրեթե բոլոր փաթեթներում թանկարժեք հետազոտությունները եւ վիրահատություններն ընդգրկված են։ Նման դեպքերում ապահովագրական ծառայությունը կփոխհատուցի բոլոր այդ ծախսերը»,-լրագրողներին ներկայացրեց «էրեբունի» բժշկական կենտրոնի գործադիր տնօրեն Արմեն Ռոստոմյանը։ Հրավիրված ապահովագրական կազմակերպություններին նախապես ներկայացվել են կենտրոնի ցանկություններն ու առաջարկությունը։ Նրանք էլ ծանոթացրել են տարբեր ծավալների, վճարումների տարբեր ձեւերով իրենց փաթեթներին։ Տարեկան 70-80-ից մինչեւ 120 հազար դրամավճարի փաթեթներ կան։ Ողջ կոլեկտիվում դրանք բավական ժամանակ մանրամասն քննարկվել են։ Հիմա եկել է ընտրության պահը։ Բուժաշխատողներին ազատ ընտրության հնարավորություն է տրվել։ Առաջիններից մեկը կարդիոպուլմանոլոգիայի բաժանմունքի վարիչ Լաուրա Եղիշովնան է գրանցվում։ Նա նախընտրել է «Ռոսգոսստրախ–Արմենիա» ԱՓԲԸ-ի առաջարկած փաթեթի ծավալն ու բուժհիմնարկների հետ աշխատելու փորձը։ Իսկ ռեւմատոլոգիայի բաժանմունքի վարիչ Արմինե Հարոյանը չի շտապում։ Մեկ անգամ եւս ծանոթանում է առաջարկված պայմաններին, որպեսզի ոչ միայն իր, այլեւ բաժանմունքի աշխատակիցների համար առավել ընդունելի որոշում կայացվի։ Միաժամանակ, առիթից օգտվելով, ցանկանում է բաժանմունքում ապահովագրական պոլիսով բուժվող հիվանդներին վերաբերող որոշ հարցեր պարզաբանել։

Անշուշտ, մեկ օրում հնարավոր չէ, որ կենտրոնի 1500 աշխատողներն ընտրություն կատարեն։ Հնարավոր է՝ հրաժարվողներ էլ լինեն։ «Էրեբունի» կենտրոնը՝ որպես գործատու, կունենա իր մասնակցությունը։ Ավելի ցածր աշխատավարձ ունեցողների ամսավճարի մինչեւ 40%-ը կվերցնի իր վրա։ Բարձր աշխատավարձ ստացողների համար, թեեւ ամսական 8-10 հազար դրամ վճարելը դժվար չի լինի, սակայն կազմակերպությունն այստեղ եւս 10%-ի չափով կմասնակցի։ Բժշկական կենտրոնի ղեկավարները վստահ են, որ մինչեւ պարտադիր բժշկական ապահովագրության համակարգի ստեղծումը, ապահովագրական այս ձեւը լուրջ դերակատարում կունենա բնակչության առողջության պահպանման գործում։ «Կամավոր ապահովագրական բժշկության առաջին առավելությունը որակյալ բուժսպասարկման մատչելիությունն է։

Երբ ավելի խոր ենք ուսումնասիրում, բազմաթիվ այլ առավելություններ են տեսանելի դառնում։ Ստացվում է, որ ապահովագրական գործակալությունը դառնում է հիվանդի հովանավորը, վերահսկում է մատուցվող բուժծառայության որակը, հետեւում է՝ հիվանդը գո՞հ է, արդյոք, թե՞ դժգոհ։ Բացի այդ, գործակալությունը բուժծառայություններ մատուցող բուժհիմնարկներին պարտադրում է անընդհատ բարելավել եւ զարգացնել ծառայությունները, լուրջ մրցակցության դաշտ է ձեւավորվում»,– ներկայացնում է «Էրեբունի» բժշկական կենտրոնի գլխավոր տնօրեն Նարինե Մամիկոնյանը։ Ի դեպ, թե որ բուժհիմնարկին դիմեն՝ կընտրեն ապահովագրվածները։ Գործակալությունը կարող է միայն խորհուրդ տալ, տեղեկացնել, թե որ բուժհիմնարկների հետ պայմանավորվածություն ունեն եւ վստահեցնել, որ այնտեղ պահանջվող մակարդակով բուժծառայություն կմատուցվի։ Բնականաբար, եթե այցելուն 1-2 անգամ դժգոհ լինի, հաջորդ անգամ այլ բուժհիմնարկ կնախընտրի։

Ինչ խոսք, բուժաշխատողների օրինակը կարող է խթանել այս շարժումը։ Այս գաղափարը հասունացել է մեր երկրում։ Բայց մարդիկ դեռ թերահավատ են։ Այնքան էլ վստահ չեն, որ իրականում բուժհիմնարկները պատշաճ, որակյալ բուժծառայություն կմատուցեն։ Դե, եթե բժիշկներն իրենք են ապահովագրվում, ուրեմն որոշակի արդյունք են ակնկալում։ «Այս նախաձեռնությունն սկսել ենք իրականացնել ավելի քան երկու տարի առաջ։ Շատ լուրջ, մանրակրկիտ հաշվարկներ են կատարվել՝ համոզվելու համար, որ պատրաստ ենք այս քայլին։ Բավական լուրջ գումար է նախատեսվել հատկացնել այս ձեռնարկին։ Փոխարենը՝ առողջ աշխատակազմ կունենաք։ Վերջին հաշվով բժշկական ապահովագրության զարգացումը մեր ժողովրդի առողջության պահպանման ապագան է, մեր հույսն է»,-ասաց գլխավոր տնօրենը։

Հարցեր, պատասխաններ, մեկնաբանություններ