Ոսկրածուծի դոնորների հայկական ռեեստր բարեգործական հիմնադրամը ստղծվել և հիմնադրվել է Հայաստանում 1999թ. հունիսին, ի պատասխան լեյկեմիայով և արյան այլ հիվանդություններով տառապող երեխաների կյանքի փրկության և բուժման համար ստեղծված խիստ անհրաժեշտության: Կազմակերպությունը գրանցվել է Հայաստանում որպես շահույթ չհետապնդող հասարակական կազմակերպություն: Հիմնադրամի նախագահն է մասնագիտությամբ կենսաքիմիկոս Ֆրիդա Ջորդանը, ով 12 տարի աշխատել է Լոնդոնի Էնթոնի Նոլան Ռեեստրում, գլխավորել է Լոս Անջելեսի Սեդար Սինայի բժշկական կենտրոնի իմունագենետիկական լաբորատորիան: Ներկայումս ղեկավարում է ՙՖաունդեյշն՚ լաբորատորիայի մոլեկուլային կենսաբանության բաժանմունքը: Հիմնադիր գործադիր տնօրենն է բժիշկ Սևակ Ավագյանը:

2000թ. դեկտեմբերի 28-ին Երևանում բացվեց ռեեստրի լաբորատորիան: Ներկայումս այն իր տեսակի մեջ միակն է ոչ միայն Հայաստանում, այլև ողջ տարածաշրջանում; Այն հյուսվածքային տիպավորման լաբորատորիա է, որտեղ որոշվում են մարդկային անտիգենները: Ռեեստրում կատարվող հետազոտությունների մակարդակը լիովին համապատասխանում է միջազգային չափանիշներին, որի համար 2006թ. լաբորատորիային տրվել է հավատարմագիր Եվրոպական Իմունագենետիկայի Ֆեդերացիայի կողմից:

Ռեեստրը անդամագրված է Ոսկրածուծի դոնորների միջազգային կազմակերպությանը (BMDW), նաև հանդիսանում է Ոսկրածուծի դոնորների համաշխարհային ասոցիացիայի (WMDA) լիիրավ անդամ:

2001թ. հունվարից սկսվել է դոնորների կամավորագրումը և մինչ օրս այս անձնվեր գործին են անդամագրվել 14000 դոնորներ ոչ միայն Հայաստանից, այլև Սփյուռքից: Մինչև այժմ ռեեստրին են դիմել ավելի քան 839 հայ և այլազգի հիվանդներ, որոնցից 675-ի համար գտնվել են դոնորներ: Կատարվել է 5 փոխպատվաստում` Լեհաստանում, Կալիֆոռնիայում, Իտալիայում, Իրանում և երկուսը` Գերմանիայում:

Հիմնադրամի հիմնական նպատակն է 2000թ. դեկտեմբերի 28-ին Երևանում ստեղծված ոսկրածուծի դոնորների հայկական ռեեստրի լաբորատորիայի միջոցով հայ հիվանդների համար գտնել ոսկրածուծի համապատասխան դոնոր և ապահովել փոխպատվաստման առավել արդյունավետություն լեյկեմիայով և արյան այլ հիվանդություններով տառապող հիվանդների համար: