Ռազմիկ Աբրահամյանը 1967 թվականին ավարտել է Երևանի պետական բժշկական ինստիտուտի (ԵՊԲԻ) բուժական ֆակուլտետը գերազանցության դիպլոմով:

1971-73 թթ. նա սովորել է Մանկաբարձության և գինեկոլոգիայի համամիութենական գիտահետազոտական ինստիտուտի կլինիկական օրդինատուրայում,պաշտպանել թեկնածուական թեզը, որից հետո շարունակել է գիտագործական աշխատանքը նույն ինստիտուտում` մինչև 1975: 

1975թ. նշանակվել է հանրապետական կլինիկական հիվանդանոցի նոր բացված օպերատիվ գինեկոլոգիայի բաժանմունքի վարիչ, այնուհետև`1988թ. իր կողմից վերոհիշյալ բաժանմունքի° բազայի վրա հիմնադրած հանրապետական կլինիկական ծննդատան գլխավոր բժիշկ, միաժամանակ համակարգելով հանրապետության շրջաններին մասնագիտական ծառայության տրամադրումը:Միևնույն ժամանակ զբաղվում է գիտամանկավարժական  գործունեությամբ` աշխատելով բժշկական ինստիտուտի մանկաբարձության և գինեկոլոգիայի ամբիոնում,որպես ասիստենտ,ապա դոցենտ:   

1990թ. մրցութային կարգով նա ընտրվում է ԵՊԲԻ նորաստեղծ մանկաբարձության և գինեկոլոգիայի թիվ2 ամբիոնի վարիչ:

Նույն թվին նա պաշտպանել է դոկտորական թեզը  Ռուսաստանի Դաշնության ԲԳԱ Մանկաբարձության, գինեկոլոգիայի և պերինատոլոգիայի գիտահետազոտական կենտրոնում և ստացել է ԵՊԲԻ-ի պրոֆեսորի կոչում:

1992թ. հիմնադրել է Հայաստանի Հանրապետության (ՀՀ) առողջապահության նախարարության (ԱՆ) մանկաբարձագինեկոլոգիական ուսումնագիտաբուժական համալիրը,ապա 1993թ. ՀՀ ԱՆ  Պերինատոլոգիայի, մանկաբարձության և գինեկոլոգիայի կենտրոնը, միաժամանակ ղեկավարելով Երևանի  Մ.Հերացու անվան պետական բժշկական համալսարանի մանկաբարձության և գինեկոլոգիայի թիվ 2 ամբիոնը,որտեղ սովորում և մասնագիտանում են տեղաբնակ և արտասահմանցի ուսանողներ:

2002թ. նշանակվել է ՀՀ  առողջապահության նախարարի խորհրդական`ծննդօգնության գծով և 1997թ.` ՀՀ ԱՆ գլխավոր մանկաբարձ-գինեկոլոգ: Ունի շուրջ 360 գիտական աշխատանք, որոնցից 90-ը տպագրվել են արտասահմանյան գիտական հանդեսներում, 5 դասագիրք, 9 ձեռնարկ, 3 մենագրություն, 8 գյուտ և հայտնագործություն: Ղեկավարել է 9 դոկտորական և 19 թեկնածուական ատենախոսություն: Նրա ջանքերով ստեղծվել են մի շարք գործնական և գիտական ծրագրեր արտասահմանյան գործընկերների հետ : Անդամ է բժշկական համալսարանի գիտական,ինչպես նաև ատենախոսությունների պաշտպանության մասնագիտացված և մի շարք ամսագրերի խորհուրդների, արտերկրյա գիտությունների ակադեմիաների ակադեմիկոս է, ինչպես նաև մանկաբարձ-գինեկոլոգների և նեոնատոլոգների հանրապետական ասոցիացիայի նախագահն է: