Ցրվածություն՝ ուշադրությունը ընտրված կամ թելադրված ուղղությամբ կենտրոնացնելու ունակության խախտում։ Այն դառնում է անկայուն։

Հյուծվածություն՝ ուշադրության ինտենսիվության հարաճուն նվազում որևէ գործունեության ընթացքում՝ ի սկզբանե բարձր աստիճանից։

Ուշադության նեղացում՝ ախտաբանական կենտրոնացում որևէ գործունեության վրա, որը պայմանավորվում է ուշադրությունը բաշխելու թուլությամբ։ Ուշադրության ծավալը սահմանափակվում է իրավիճակային և անձնային նշանակություն ունեցող օբյեկտներով։

Դժվարաշարժություն՝ ուշադրության դանդաղ և դժվար շարժողականություն մի օբյեկտից մյուսն անցնելու ընթացքում։ Արտահայտվում է նրանով, որ հիվանդի ուշադրությունը շարունակում է կենտրոնացած մնալ իր արդիականությունը կորցրած օբյեկտների վրա։

Շեղվածություն` ուշադրության ախտաբանական ակտիվացում, որն արտահայտվում է իրավիճակով կամ հիվանդի ներքին մղումներով՝ պայմանավորված չլինելով ուշադրության կենտրոնացման կամ ինտենսիվության տատանումներով։ Օբյեկտների և գործունեության տեսակների հաճախակի փոփոխությունները հիվանդի ընդհանուր գործունեությունն անիմաստ և ապարդյուն են դարձնում։

Ուշադրության խանգարումները դիտվում են բոլոր հոգեախտաբանական վիճակների կառուցվածքում։ Առավել բնորոշ են ասթենիկ, նևրոտիկ, աֆեկտիվ խանգարումներին։ Հաճախ են դիտվում նաև գիտակցության խանգարումների և թուլամտության ժամանակ։

Հոգեբուժություն
Ս.Հ. Սուքիասյան, Ս.Պ. Մարգարյան
Տեղեկատվություն: med-practic.com