Ըստ Հին հունական դիցաբանության, Էդիպոսը սպանում է Թեբեի թագավոր Լայիոսին, չիմանալով, որ նա իր հայրն է ու թագավորը, և ակամա ամուսնանում թագուհի Իոկաստեի հետ, չիմանալով, որ նա էլ իր մայրն է։ Արդյունքում տիրանում է Թեբեի թագավորությանը։ Ճշմարտությունն իր համար պարզելուց հետո Էդիպոսը կուրացնում է իրեն, իսկ Իոկաստեն ինքնասպան է լինում։

Էդիպոսի բարդույթը հոգեվերլուծաբանների կողմից նկարագրված լիբիդոյի` զարգացման բազմաթիվ հոգեբանական բարդույթներից մեկն է։ Ըստ Ֆրոյդի, դա գիտակցությունից արտամղված, հուզականորեն հագեցած սեքսուալ երևակայության դրսևորումներից է, որն անձի զարգացման համար ունի բացասական նշանակություն։ Էդիպոսի բարդույթը բնութագրվում է մոր հանդեպ որդու սեքսուալ հակումով, հոր հանդեպ` անբարյացակամ վերաբերմունքով։ Հոգեվերլուծաբանները Էդիպոսի բարդույթը դիտում են որպես անձի սեքսուալ զարգացման անխուսափելի փուլ, երբ ուշ մանկության շրջանում երեխան իր էներգիայի մի մասը տեղափոխում է դեպի ծնողների նկատմամբ ունեցած սեռական հակումը։ Ֆրոյդը Էդիպոսի բարդույթը դիտարկում է որպես մանկական սեքսուալության գագաթնակետ և նևրոզների ու շիզոֆրենիայի առաջացման հիմնական պատճառ։

Հարություն ՄԻՆԱՍՅԱՆ, հոգեբույժ
«Առողջապահություն» հանդես, 02.2009
Տեղեկատվություն: med-practic.com