Երևանում կայացավ «Սրունք-թաթային հոդ և ոտնաթաթ» խորագրով համաժողովը

Ապրիլի 29-30-ը Երևանում` «Բեսթ Վեսթերն Պլյուս Կոնգրես» հյուրանոցում,  կայացավ «Սրունք-թաթային հոդ և ոտնաթաթ» խորագրով համաժողովը:  Համաժողովի կազմակերպիչներն էին՝ «Հավերժական Ազգ» (Eternal Nation Foundation) բարեգործական հիմնադրամը, Գյումրու օրթոպեդիկ դպրոցը (Gyumri Orthopedic School), ՀՀ ԱՆ Առողջապահության ազգային ինստիտուտը։

Երկօրյա համաժողովը մեկ հարկի տակ էր հավաքել 200-ից ավելի մասնակիցների Հայաստանից, Վրաստանից, Ռուսաստանից, Ղազախստանից, Ուզբեկստանից, Մոնղոլիայից:

Դասախոսական կազմում էին անվանի օրթոպեդ-վնասվածքաբաններ Հայաստանից, ԱՄՆ-ից, Շվեյցարիայից, Լեհաստանից, Հունաստանից, Ռուսաստանից, Լիտվայից:

«Հավերժական ազգ» հիմնադրամի նախագահ, համաժողովի կազմկոմիտեի համանախագահ ԱՄՆ-ում բնակվող վնասվածքաբան-օրթոպեդ Արմեն Հակոբջանյանը մեզ հետ զրույցում ընդգծեց, որ փորձի փոխանակումը բժիշկի համար ամենակարևորը պետք է լինի։

«Բժիշկները պետք է շարունակ շփվեն միմյանց հետ, որպեսզի փոխանակվեն մտքերով․ լավագույն բժիշկները պետք է կարողանան փոխանցեն իրենց փորձը երիտասարդ բժիշկներին։ Միայն այս դեպքում կարող ենք  Հայաստանում բարձրացնել բժշկական սպասարկման որակը։

Մեր համաժողովին այս անգամ մասնակցում էին բանախոսներ 7 երկրից ։ Ընդ որում՝ ոլորտի  լավագույններն են։ Հուսամ՝ նրանց կհաջողվի հայ բժշկության մեջ որոշ փոփոխություններ կատարել և հակառակը՝ վերցնել մեր ունեցած փորձը»։

Բժիշկ Հակոբջանյանը նշեց, որ մեր օրերում պետք է զինվել գիտելիքով և պատրաստ լինել նոր մարտահրավերների։ 

    
«Ցավոք, այսօր աշխարհում գնալով թեժանում են պատերազմական գործողությունները, և մենք պետք է պատրաստ լինենք փրկել մարդկանց կյանքը։ Այդ առումով, կարող եմ ասել, որ պատերազմից հետո մենք բավականին մեծ փորձառություն ունեցանք»:

ԱՆ Առողջապահության ազգային ինստիտուտի վնասվածքաբանության ամբիոնի ղեկավար, Մոսկվայի արևմտյան շրջանի գլխավոր վնասվածքաբան, «Գյումրու օրթոպեդիկ դպրոցի» համահիմնադիր,  բ.գ.թ. Նորայր Զաքարյանը մեզ հետ զրույցում ասաց, որ բավականին մեծ հետաքրքրություն է եղել միջոցառման նկատմամբ։

«Ունենք տարբեր երկրներից գրանցված բժիշկներ, որոնք ցանկություն են հայտնել մասնակցել համաժողովին։ Անկեղծորեն զարմացած էինք, որ, օրինակ, Մոնղոլիայից անգամ գրանցված մասնակից ունենք։ Ինչ խոսք, ուրախալի փաստ է։ Բժիշկները իրենք են մուտք գործում կայք ու գրանցում իրենց մասնակցությունը։ Սա խոսում է այն մասին, որ Գյումրու օրթոպեդիկ դպրոցի կողմից կազմակերպված միջոցառումներն ապահովում են բարձր որակ, և հենց դրանով է պայմանավորված մարդկանց գալու և մասնակցելու ցանկությունը։ Կարճ ժամանակահատվածում կարողացել ենք վստահություն առաջացնել բժիշկների մոտ»։

Բժիշկ Ն․ Զաքարյանի փոխանցմամբ՝  Գյումրու օրթոպեդիկ դպրոցը տարվա ընթացքում կազմակերպում է ավելի քան 10 միջոցառում, ինչպես մեծ, այնպես էլ փոքր ձևաչափերի, այդ թվում՝ պրակտիկ։

«Միջոցառումները բավականին բուռն են անցնում։ Բանախոսները շատ հետաքրքիր ձևաչափով են իրենց գործընկերներին մատուցում գիտական նյութը (ոչ ընթերցանության տեսքով), որն, ինքնին, առաջին իսկ րոպեներից մեծ հետաքրքրություն է առաջացնում, և դա լավ է»։

Խոսելով ապագա ծրագրերից, պարոն Զաքարյանը կարևորեց․

«Ամենակարևորն այն է, որ լինենք հետևողական, և մեր բռնած գործը շարունակական լինի։ Իսկ մեր դպրոցի գերնպատակը՝ Հայաստանում վիրաբուժական լաբորատորիա ստեղծելն է»։

Համաժովի կազմկոմիտեի համանախագահ մոսկվաբնակ վնասվածքաբան Լևոն Մակինյանը մեզ հետ զրույցում նշեց, որ գործընկերների հետ խոսելու է իր կողմից ստեղծված մեթոդի մասին։

Պարոն Մակինյանի փոխանցմամբ՝ ոտնաթաթի ձևախախտումը հաճախ հանդիպող ախտաբանություն է։

«Թեման ավելի քան ակտուալ է։ Այն, իհարկե, ավելի շատ վերաբերում է կոսմետիկ վիրաբուժությանը, բայց սա բուն օրթոպեդիկ ախտաբանություն է։ Խոսքը ոտնաթաթի մատերի ձևախախտման մասին է, երբ, օրինակ, չորորդ մատն ավելի կարճ է մյուս մատներից։

Դիմողների մեծամասնությունը կանայք են, որոնք ունեն զուտ հոգեբանական խնդիրներ։ Հատկապես ամռան ամիսներին ստիպված են լինում հրաժարվել բաց կոշիկ կրելուց։   

Մեթոդն առաջին անգամ կիրառել եմ 2012 թվականին։ Անշուշտ, տեխնոլոգիաների զարգացման հետևանքով այն զգալի փոփոխությունների է ենթարկվել, է՛լ ավելի կատարելագործվել, ավելի հասանելի է դարձել, ինչի մասին էլ պատմել եմ զեկույցի ժամանակ»։

Պարոն Մակինյանն ասաց, որ վերականգնողական փուլը մոտավորապես 6 շաբաթ է տևում, որից հետո հիվանդը կարող է այլևս չկրել օրթոպեդիկ կոշիկներ»։  

«Ուիգմոր Քլինիք»-ի մանկական օրթոպեդիայի ծառայության ղեկավար Կարեն Քոլոյանը, համակարծիք լինելով գործընկերների խոսքին, կարևորեց միջոցառումը՝ նշելով, որ այն հատկապես կարևոր է երիտասարդ բժիշկների համար։

«Իմ զեկույցում խոսել եմ ոսկրային դեֆեկտների վերականգման մասին, ինչպես երեխաների, այնպես էլ մեծերի մոտ։ Խոսքը պրոֆեսոր Մասկուլեի կողմից ստեղծված մեթոդի մասին է, որն այսօր համարվում է գրեթե անփոխարինելի՝ հատկապես պատերազմական գործողությունների ժամանակ ստացած վնասվածքների դեպքում։

Մեթոդի արդյունավետությունը կայանում է նրանում, որ հիվանդը կարճ ժամանակահատված է անցկացնում հիվանդանոցում։ Հետվիրահատական շրջանը մոտավորապես 3-4 օր է տևում»։

Հարցեր, պատասխաններ, մեկնաբանություններ