Ինչպե՞ս է գույնն ազդում տրամադրության ու առողջության վրա

Դեռ մեծն Գյոթեն է  նկատել, որ դեղինը պայծառ զգացումներ, կապույտը` սառը, մանուշակագույնն ինչ-որ անուրախ, իսկ կարմիրը տպավորությունների մի ողջ գամմա է ծնում: Հայտնի է, որ գույնն ազդում է տրամադրության, ինքնազգացողության ու, վերջին հաշվով, նաև առողջության  վրա:

Գույնն ու առողջությունը

Դեռևս հնագույն քաղաքակրթությունների ժամանակ գույները կիրառում էին բուժման նպատակով: Այսպես. Հին Եգիպտոսի տաճարներում հատուկ սենյակներ կային, որտեղ արեգակի ճառագայթները բեկվում էին ու  գունապնակի տարբեր երանգներ առաջացնում: Մարդը բառացիորեն լողում էր այդ գույների մեջ: Մեթոդը կոչվում էր ռաթերապիա: Մեր օրերում դրան փորարինելու է եկել քրոմաթերապիան, որն ուսումնասիրում է գույնի ազդեցությունը մարդու առողջության վրա: Այսպես`

Կարմիրը խթանում է նյարդային կենտրոնները, ուղեղի ձախ կիսագունդը և լիցք է հաղորդում լյարդին  ու  սրտին: Այն կիրառվում է սակավարյունության, բրոնխիալ ասթմայի, թոքաբորբի, ներզատիչ համակարգի հիվանդությունների, հոդաբորբի, աչքի ցանցաթաղանթի ու շլաչքության  դեպքում:

Կարմիրը հակացուցված է  ջերմատենդի, նյարդային գրգռվածության, արյան բարձր ճնշման, բորբոքային պրոցեսների  դեպքում: Հետաքրքրական է, որ այն վատ ազդեցություն է ունենում նաև  վառ կարմրահերների վրա:

Դեղինն ու կիտրոնագույնն ակտիվացնում են  շնչառական կենտրոնները, վերականգնում մկանային էներգիան, խթանում ու մաքրում լյարդը, աղիքները, մաշկը: Օժտված են լեղամուղ ու թուլացնող հատկությամբ: Դեղինը բերկրանքի ու սեքսուալության գույնն է: Կիրառվում է շաքարային դիաբետի, մարսողական խանգարումների, լեղապարկի թերֆունկցիայի բուժման ու աղիքների աշխատանքի կարգավորման համար: Ակնաբուժության մեջ այն կիրառվում է շլաչքությունը, թույլ տեսողությունը, ցանցաթաղանթի աչքի անոթները բուժելու նպատակով: Չի կարելի դեղինը օգտագործել բարձր ջերմության , նևրալգիաների, գերգրգռվածության, բորբոքային ու տեսողական հալյուցինացիաների ժամանակ:

Կանաչը վերացնում է անոթների սպազմն ու իջեցնում արյան բարձր ճնշումը: Լայնացնում է մազանոթներն ու նպաստում բարձր տրամադրությանը: Ուստի այն կիրառվում է  սրտանոթային հիվանդությունների, ասթմայի, օսթեխոնդրոզի, իմպոտենցիայի ու անքնության ժամանակ: Հաջողությամբ կիրառվում է գլաուկոմայի, աչքի ցանցաթաղանթի ու տեսողական նյարդի բուժման համար:

Կապույտը ընդհակառակը` նպաստում է անոթների սպազմին, բարձրացնում արյան ճնշումը: Ունի հակամանրէային ազդեցություն: Այն կիրառում են սենյակն ախտահանելու, ականջի, քթի ու կոկորդի, աղեստամոքսային տրակտի  հիվանդությունների դեպքում: Իսկ այդ գույնի երկար ազդեցությունից առաջանում է հոգնածություն ու դեպրեսիա:

Մանուշակագույնը խթանում է  վահանաձև գեղձի աշխատանքը, լեղապարկի ֆունկցիան, բարձրացնում է մկանային տոնուսը: Մնացած դեպքերում այն գործում է կապույտի պես:

Գույնն ու տրամադրությունը

Հագուստ գնելիս կամ բնակարանը կահավորելիս մենք նախընտրում ենք այս կամ այն գույնը: Ունենք սիրելի ու չսիրված գույներ: Հոգեբանները հավատացնում են, որ դա հենց այնպես չէ: Բնավորությունն ու տրամադրությունը ոչ միշտ են համընկնում:

Երբեմն հագուստ ընտրելիս, չգիտես ինչու, ընտրում եք ձեզ «անհարիր», այլ գույն: Որոշ ժամանակ անց հասկանում եք, որ իզուր եք փող ծախսել ու աշխատում եք ազատվել նոր ձեռքբերումից: Հոգեբաններն այդ երևույթը բացատրում են  «տրամադրությունը փոխելու» չգիտակցված ցանկությամբ: Գիտնականներն առաձնացնում են հիմնական գույներ, որոնք մարդու հոգեբանական տրամադրվածությունն են որոշում:

Կարմիրը կամքի ուժի, ակտիվության ու ագրեսիվության, ինչպես նաև անկախության, շարժունության գույնն է: Այն կյանքը լցնում է կրքով ու ցանկություններով: Եթե կենցաղը ձեզ ճնշում է  կամ աշխատանքը խեղճացրել է,  օգտվեք այդ գույնից: Եթե հուզված եք, նյարդային, ապա կարմիրը ավելի կսրի ձեր վիճակը:

Նարնջագույնը լավատեսության գույնն է, սրտաբացության, իմպուլսիվության ու համառության: Այս գույնը նախընտրողները լավ ընկերներ են, միշտ պատրաստ օգնության:

Վարդագույնը կանացիության ու քնքշության գույնն է:

Դեղինը արևի լույսի, բերկրանքի ու հույսի գույնն է: Այս գույնը նախընտրում են  կենսուրախ, նպատակաուղղված, ակտիվ ու էքսպանսիվ մարդիկ: Դեղին կրող մարդը բարեկամ է, ինքնավստահ, կարողանում է գումար վաստակել: Այս գույնն օգնում է պահպանել կառուցվածքը:

Կանաչը վկայում է մտքի ճկունության, դատելու, իրավիճակը գիտակցելու ունակության մասին: Խորհրդանշում է  ֆինանսական բարեկեցություն  ու բարգավաճում: Վառ կանաչը երիտասարդացնում է: Կանաչի  նկատմամբ անհանդուրժողականությունը մատնում է անձի դժգոհությունը  զգացմունքային վիճակից:

Երկնագույնը խաղաղության ու ճշմարտության գույնն է: Այս գույնը նախընտրողները կարող են բավական փափուկ  ասել ճշմարտությունը ու միշտ  էլ ճիշտ են հասկացվում: Երկնագույնի նկատմամբ սերը խոսում է բարձր ինտելեկտի մասին: Այս գույնի բնույթը զսպվածությունն է ու թեթևակի սառնությունը: Իսկ եթե գեր եք, խուսափեք այս գույնից:

Կապույտը պասիվ ու զգացմունքային մարդկանց գույնն է, որոնք սիրում են կարգուկանոն ու մաքրություն: Հանգստությունը նրանց համար վեր է ամենից:

Մանուշակագույնը վերամբարձության ու խորհրդավորության  գույնն է: Այս գույնը նախընտրողները ստեղծագործող են, ձգտում են բոլորին հմայել: Իսկ եթե դա նրանց չի հաջողվում, ապա դառնում են քմահաճ ու պոռթկուն:

Շագանակագույնը պահպանողականության  խորհրդանիշն է, որը կայունություն, ամեն ինչում զսպվածություն ու համեստություն է խորհրդանշում: Այս գույնը նախընտրողները գերազանց աշխատողներ ու գործընկերներ են, որոնց միշտ կարելի է վստահել:

Սպիտակը մաքրության, ողջախոհության ու հոգեկան հավասարակշռության  գույնն է, սակայն  դրանով տարվել չարժե, քանի որ այն կարող է ներփակության ու վերացականության մղել:

Մոխրագույնը գործնական գույն է: Այն կրողը ուժեղ բնավորության տեր է, համբերատար ու աննկուն: Գերադասում է  հսկել զգացմունքները, ձգտում է կայունության:

Սևը «ճակատագրական կնոջ», եսակենտրոնության ու անողոքության գույնն է: Սակայն նորաձևության աշխարհում այն կարծիքն է իշխում, որ սևը էլեգանտության ու լավ ճաշակի նշան է:

Այսպես, ուրեմն, կրկին ու կրկին` աշխարհում ամեն ինչ իմաստ ունի ու ոչինչ հենց այնպես չի լինում:

Հարցեր, պատասխաններ, մեկնաբանություններ