Հղիությանը պետք է հետևի բուժքո՞ւյրը, թե բժիշկը, էխոն` մե՞կ, թե մի քանի անգամ. ԱՀԿ առաջարկներն ու ԱՆ դիրքորոշումը

Մայրական և մանկական մահացության ցուցանիշները Հայաստանում վերջին տարիներին նվազել են: Առողջապահության նախարարության ու Առողջապահության համաշխարհային կազմակերպության մասնագետները սա ֆիքսում են, միաժամանակ հայտարարում, որ անելիքներ այդ առումով կան, պետք է մեծացնել նվազման միտումները` հասնելով ԱՀԿ կողմից սահմանած դեպքերի տարեկան 5.5 տոկոս կրճատման: 

Ներկայումս ԱՀԿ եվրոպական տարածաշրջանի 53 երկրներում մայրական մահացության դեպքերը տարեկան նվազում են 3.8 տոկոսով, վերջին երկու տարվա ընթացքում տեմպը նվազել է` նախկինում տարեկան նվազումը կազմում էր 4.1 տոկոս:

ԱՀԿ մի քանի մասնագետներ արդեն մի քանի օր է` Հայաստանում են, 10 օր ուսումնասիրություններ են իրականացրել մայրաքաղաքի, քաղաքային ու գյուղական համայնքների 8 բուժհիմնարկներում, այսօր և վաղը կամփոփեն արդյունքները, քննարկումներ կլինեն տեղացի մասնագետների հետ, ապա կմշակվի ու նախարարությանը կներկայացվի Հայաստանում առողջության առաջնային պահպանման օղակի և ուղեգրումների համակարգի բարելավման արդյունքում մայրական և նորածնային հիվանդացության և մահացության կրճատման ուղղությամբ առաջարկվող հետագա քայլերը:

Նշենք, որ 2010-ին Հայաստանում անցկացված Հայաստանի առողջության և ժողովրդագրության հարցերի հետազոտության արդյունքների համաձայն`  2001-2005 թվականին գրանցվել է նորածնային մահացության 24 դեպք/1000 կենդանածնի հաշվով/, իսկ 2006-2010-ի ընթացքում` 13 մահ, նմանատիպ անկում նկատվում է մինչև հինգ տարեկան երեխաների շրջանում` 27 դեպքից 2006-2010-ին գրանցվել է 16 մահ:

ԱՀԿ եվրոպական տարածաշրջանային գրասենյակի փորձագետ Գունտա Լազդանեն կազմակերպության արձանագրած ցուցանիշների վերաբերյալ զեկույցի վերջին էջին սիրտ է պատկերված. «Մենք պետք է ամեն ինչ անենք, որ մայրերի ու մանուկների սրտերը չդադարեն բաբախել»:

Առողջապահության նախարարության մոր և մանկան առողջության պահպանման վարչության պետ Կարինե Սարիբեկյանը Panorama.am-ի թղթակցի հետ զրույցում նշեց, որ ուրախալի է, որ մահվան դեպքերի թվում գնալով պակասում են պերինատալ պատճառներով պայմանավորված դեպքերը:

«Մենք ունեցել ենք մահվան դեպք ինֆարկտից, մինինգիտից, բայց քանի որ հետծննդյան 42 օրերի ընթացքում են եղել, արձանագրել ենք որպես մայրական մահացություն»,-ասաց Սարիբեկյանը:

Առողջապահության համաշխարհային կազմակերպության խորհրդատու Օլեգ Շվաբսկիյն ի պատասխան Panorama.am-ի հարցի, նշեց, առողջության առաջնային պահպանման ծառայությունների բարձ որակը մայրական և նորածնային հիվանդացության և մահացության կրճատման գրավականն է:

«Ուսումնասիրությունների ընթացքում մենք զրուցում էինք ոչ միայն կանանց հետ, նաև տղամարդկանց, երեխաների: Նրանք ասում էին, գոհ են, ժպտում էին, տեղեկացված էին անվճար ծառայությունների մասին: Բայց մենք այտեղ ենք` հետևելու, ոչ թե նախարարության ու ազգային իշխանությունների կատարած աշխատանքներին, այլ այն բանին, թե որքանով են դրանք կատարվում ԱՀԿ չափանիշների ու մեթոդոլոգիայի շրջանակում: Մենք այս առումով որոշ բացեր ու թերություններ արձանագրեցինք»,-ասաց Օլեգ Շվաբսկիյը: Մասնագետը կարծում է, եթե հղիությունն ընթանում է նորմալ, ապա նրանք պետք է հետևի ու ծննդաբերությունն ընդունի ոչ թե մասնագիտացված բժիշկը, այլ բուժքույրը, ինչպես դա արվում է շատ երկրներում:

Panorama.am-ի հետ զրույցում այս դիտարկման հետ չհամաձայնեց Կարինե Սարիբեկյանը. «Մանկաբարձ գինեկոլոգը գոնե չորս անգամ պետք է տեսնի, զննի հղիին: Մենք ասում ենք, գոնե երկու, նույնիսկ երեք անգամ էխո անենք, իրենք ասում են` մեկ անգամ: Բայց արդյո՞ք այդ մեկ անգամով ամեն ինչ կախտորոշվի: Ես վստահ եմ, որ չունենք այն սոնոգրաֆիստներին, որոնք կարող են ոչինչ բաց չթողնել: Մենք իհարկե առաջարկությունները կքննարկենք, բայց որոշումները կկայացնենք` ելնելով մեր երկրի առանձնահատկություններից, մեր պոտենցիալից, ժողովրդի մոտեցումներից»:

Նշենք, որ աշխատաժողովը կշարունակվի մինչև օրվա վերջ: Վաղն արդեն կստեղծվի նեղ մասնագետներից կազմված խումբ, որը կմշակի առաջարկները:

Հարցեր, պատասխաններ, մեկնաբանություններ